't is gedaon, bedank det geej d'r allemaol beej waas! Weej hebbe genaote! Hald òs website in de gate; want binnekort kint geej heej de nieje cd bestelle!

Frans Pollux

Frans Pollux (1977) kump oét ’n Venlose vastelaovendfemilie. Zienen opa en ziene pap verkochte de greunte die ze beej Wiel thoés verbouwde. Umdet pap Jan buuteredner waas, woel kleine Fransje det auk. Beej Jocus Toekôms en in ’t Bliérickse Muspelheim preufde hae aan ’t podium, en auk beej de iërste Venlose Revue stônd hae as 4-jäörige menke op de buun. ’t Podium smakde good: van 1996 wies 2009 waas Frans veurman van Neet oét Lottum. Maar de pen trek um nog miér: hae schreef twië beuk, en is inmiddels hoésschriéver van ’t professionele toniëlgezelschap Toneelgroep Maastricht.

Wiel Aerts

Wiel Aerts greuide op in ’n Venlose gerdeneersfemilie, wie de Greunstraot nog ech greun waas. Groëtgebrach mit volkscultuur en vastelaovend: Wiel woort jeugprins beej de jeugklup van de Heilig Hartparochie en waas later mei-oprichter en Vors van de Törvers. Zien tekste kòs hae vanaaf zien 16e kwiét in d’n buut. En wie:

in 1976 woort-e Kampioen beej Vaat Elf mit de legendarische buut Kumpse in de stad, waat zuus-e? Pruuse! Mit Ben Verdellen vormde Wiel jaorelangk ’t komisch duo Paeper & Zalt. Hae schreef tekste veur de plaate van Ben en vastelaovesleedjes veur gans Groët-Venlo. Hae schreef mei aan de Bliérickse revues, en in 2005 rolde Altiéd ‘tzelfde leedje oét de pen. Det waas de zesde Venlose Revue. Auk de zevende Revue De Slaag um ’t Jaomerdal druüg zien handteikening. En noow auk Schoëne Schien.