D'n tied van
Toeën
Schrieversteam nieje Venlose Revue 2026 bekind: perfekte mix van modern en tradisioneel theater.
De nieje Venlose Revue die in ‘t naojaor van 2026 in première geit, wuurt geschreve door ‘n niej schrieversteam: Eileen Bosch, Yentl Evers, Koos Franssen, Laura Hendrikx en Emiel Ketellapper Dit is woensdaagaovend 11 oktober bekind gemak.
Tiejes deze beslaoten aovend prissenteerde veer genomineerde groepe zich in De Maaspoort Theater & Events aan de vakjury. Dees besteit oet Theu Boermans (teniel- en filmregisseur), Leo Thomasse (directeur-bestuurder van De Maaspoort Theater & Events) en Jeroen Marcelissen (regisseur van dees nieje Venlose Revue). De werktitel van dees nieje revue is: D’n Tied van Toeën.
Jeroen Marcelissen – dae zelf zien debuut mak as regisseur van de Venlose Revue – waas ónder d’n indrök van alle veer de pitches. ‘’t Waas fantastisch um te ervare wie alle genomineerde zich hebbe ingezatte um eur verhaollien zoeë sterk meugelik te prissentere. De passie um ‘n goje revue te schrieve waas dudelik beej alle veer de kandidate aanwezig. Det allein al is pure wins veur de toekóms.’
Marcelissen verklaort de keus veur ‘t winnende vieftal: ‘Zeej hebbe woensdaagaovend in twintig menute ‘n soort van mini-revue geprissenteerd. Neet door de verhaollien te vertelle, aevel door de scènes en leedjes daadwerkelik oet te voere. Det makde vuul indrök op de jury. ‘t Verhaol sluut aan beej dezen tied en zal ouk de jeug aanspraeke. Alle meugelikhede die ‘t theater vandaag d’n daag te beje haet, kump aan bod. De leefhebbers van ‘ne klassieke revue gaon ouk volop gaon genete mit dank aan de echte Venlose typetjes, prachtige kóstuums, pakkende leedjes en netuurlik de bekinde schaterlach. Dit is ‘ne perfekte mix van niej en traditioneel; geschreve en bedach door ‘n kwiek, jóngk schrieversteam.’
Zónder al te vuul euver de verhaollien te verklappe wil Marcelissen ós toch alves ‘n tipje van de sluier oplichte: ‘D’n houfpersoeën kump oet ‘nen andere stad en liert ‘t Venlo van vruuger wies noow op ‘ne moderne wies kinne. Aan ‘t ind van ‘t verhaol bliek Venlo ‘n stad um van te halde.’
Marcelisen geit noow mit ‘t team aan de slaag um ‘t verhaol vaerder in te kleure. De audisies gaon medio 2024 plaatsvinde. ‘Weej haope det ech zoeë vuul meugelik verschillende Venlonaere zich heej veur aanmelde. Want ‘t verhaol guuef ouk ech meugelikhede veur minse die ‘t tradisionele Venlose dialek spraeke. Dees revue is veur idderein.’
Vanaaf ‘t moment det de regisseur woensdaagaovend de name van ‘t winnende team oetsprook wis hae zelf: ‘Noow geit ‘t beginne!’. Galderend zaet hae: ‘Weej hebbe ‘n verhaol mit personages en leedjes. Vanaaf noow wuurt ‘t spannend, aevel baovenal huul erg tóf! Weej gaon gezamelik ‘n waanzinnig moeijen tied tegemoot!’
